Колледж студенттері арасында «ҰЛТТЫҚ ҚҰНДЫЛЫҚ – ҰРПАҚҚА АМАНАТ» атты зияткерлік сайыс өтті

Жастар арасында ұлттық құндылықтар мен рухани адамгершілік, имандылық қасиеттерді қалыптастыру мақсатында 28 қараша күні Атырау облысы Дін істері басқармасының қолдауымен «Шапағат» деструктивтік діни ағымдардан жапа шеккендерге көмек орталығы» қоғамдық қорының ұйымдастыруымен Атырау қаласының колледж студенттерінің қатысуымен «ҰЛТТЫҚ ҚҰНДЫЛЫҚ – ҰРПАҚҚА АМАНАТ» атты зияткерлік сайыс өтті.
«Таныстыру», «Бәйге», «Сандар сөйлейді», «Белес», «Діни экстремизм мен терроризмге жол жоқ!», «Өнерліге өріс кең» атты 6 бөлімді қамтыған тартысты білім бәйгесінде студенттер бар өнерлерін ортаға салып, белсенділікпен қатысты.
Әділқазы алқасы құрылып, оның құрамында «Шапағат» деструктивтік діни ағымдардан жапа шеккендерге көмек орталығы» қоғамдық қоры директорының орынбасары Құбышев Мейірбек Ғайнеденұлы, қоғамдық қордың теолог мамандары Күмісбек Думан Асқарұлы мен Олжабай Нұрлан Батырбекұлы қазылық етті.

Нәтижесінде жеңіске жеткен Атырау жоғары Болашақ көпсалалы колледжінің студенттері «Бас жүлдемен» және арнайы сыйлықпен марапатталды. Атырау жоғары медициналық колледжінің студенттері жүлделі І орынды және бағалы сыйлық иеленді. «Дина Нұрпейісова атындағы халықтық музыка Академиясы» Атырау музыка колледжінің студенттері жүлделі ІІ орынды және бағалы сыйлық, Атырау энергетика және құрылыс колледжі мен Атырау Сервис колледжінің студенттері жүлделі ІІІ орынды иеленіп, бағалы сыйлық берілді.